\_sh v3.0  400  Text
\_DateStampHasFourDigitYear

\ref CORD42.002
\tx Mei ua bie izoikano daanɨ kaɨ komekɨ ifuedo mei kaɨ uuritɨkaɨ.

\ref CORD42.003
\tx daanɨ kaɨ ua taɨjɨedo eroidɨkaɨ, kaɨ jɨaɨma taɨjɨedo eroiñedɨkaɨ,
jɨaɨmɨe komekɨ uriyafuena kaɨ onoiñedɨkaɨ.

\ref CORD42.004
\tx Ie iedo ua fia ua dɨnomona mei uruemo ite rafueita
einamakɨdɨmakɨ, einamakɨ mamekɨ naanɨ abɨna onori.

\ref CORD42.005
\tx Ie abɨna onoiñena izoi uurite, ebena uurite, jɨaɨma urue jakɨdokana
uite, ñuefue daɨinide, ie ikɨrafue; ie iadɨ mei kaɨ onoiñedɨkaɨ ¿nɨɨe
ikɨrafuedo makade?

\ref CORD42.006
\tx ¿Buu mei makataga?, ¿o mɨnɨka eroikano mei uurite?

\ref CORD42.007
\tx Taɨno baka mei ua kome jɨaɨma ua ikɨñede, ua iadɨ jɨaɨma mei
komekɨdo.

\ref CORD42.008
\tx Ie jira, ¿nɨbai ite mei ikɨrafue, ite uriyafue?

\ref CORD42.009
\tx Meita mei einamakɨ ebena uurite, afeno fɨenide daɨi uriya.

\ref CORD42.010
\tx Mei, ¿buumo jutaitɨkaɨ?, ¿buu mei ua daɨitɨkaɨ?

\ref CORD42.011
\tx Ie jira mei iadɨ mei yoga.

\ref CORD42.012
\tx Kue akɨ daɨitana jira kue uriya daɨna, nia kaɨ onodɨkaɨ.

\ref CORD42.013
\tx Ie mei yoñena fia ua ebena ua be daɨi zefuiya fɨenide, baɨfene
mei meairede, ja baɨfene ua uriyafuena mei ja jaaide.

\ref CORD42.014
\tx Ie jira mei, ¿nɨɨe mei ua einamakɨ mei daɨitana?, ¿mɨnɨka ua, ua
baɨfene mei ua ikɨrafuedo makade?

\ref CORD42.015
\tx Mei fia ua, ua be daɨi uuritɨkue, daɨinide.

\ref CORD42.016
\tx Kome iya eroikano uurite, iadɨ nana ua kome ua daɨinide.

\ref CORD42.017
\tx Ba iadɨ mei ua ba iyamɨe dɨga, kome iuvai yote.

\ref CORD42.018
\tx Akie izoikano kaɨ komekɨ mei nɨɨ bifomo kaɨ uaina ite, jiibina uai
dɨona uai, jɨkanote.

\ref CORD42.019
\tx Jae einamakɨ daɨitade, ie jira einamakɨ ja ua ja mei rafuena imakɨ
yɨɨnote, ie iadɨ baie uafue daɨiñede, uafue daɨiñede.

\ref CORD42.020
\tx Ie jira, ɨko dɨnoñede ja daɨdɨkue, dɨnodenia mei ua tɨɨ ñeite.

\ref CORD42.021
\tx Iadɨ onido mei omoɨ maka, ja ua kue daɨdɨkue.

\ref CORD42.022
\tx Baɨ bifomo atɨñeno iri, ua rafueita o yoiri, ua rafue yuaɨga mei
yoga.

\ref CORD42.023
\tx Ie mei baie uai ua jaarede, kaɨ komuiñena uai.

\ref CORD42.024
\tx Ie jira mei ua jino yoiadɨ mei onoiyena, ¿nɨbai ite ikɨrafue?,
daɨdɨkaɨ.

\ref CORD42.025
\tx Ie jira mei menakaño afe izoi itɨno mei uafueita ua rafueita kaɨmo
yoiri.

\ref CORD42.026
\tx daanɨ omoɨ ikɨrafue eroikana makadɨomoɨ, onido omoɨ maka.

\ref CORD42.027
\tx Bifori iñede ikɨrafue, kaɨ jɨaɨmado eroikana eroiyena iñede.

\ref CORD42.028
\tx Einamakɨ mei ba iadɨ mei uurite, mei iñenia uriñede.

\ref CORD42.029
\tx Akɨ daɨi eroikano afeno beno nɨɨ uaina itɨno kaɨ urue kaɨ rairuiya
uaina itɨmɨe mei akɨ daɨi daɨde.

\ref CORD42.030
\tx Akɨ dɨnori mei baimɨe uai kaɨ yoga.

\ref CORD42.031
\tx Uai raɨi, ebena zefuiñeno, kaɨ daɨnano.