\_sh v3.0  400  Text
\_DateStampHasFourDigitYear

\ref CORD47.002
\tx Mei eroiadɨ onoiga, eroñeniadɨ mei jaka be ñue itɨkue, daɨdɨkaɨ.

\ref CORD47.003
\tx Ua mei kɨonaita ua be ñue ite kaɨ daɨiri.

\ref CORD47.004
\tx Nɨɨe uai ua bie yotɨkue akɨ daɨi uuritɨkue, meita ua ñue ite daɨde.

\ref CORD47.005
\tx Ie mei ua nɨɨ uafuena bie itɨno mei uriya.

\ref CORD47.006
\tx Ie mei kaɨ komedɨkaɨ ua abɨ eroidɨkue, kaɨ iyano eroidɨkue.

\ref CORD47.007
\tx Ua meita ñue ua kɨoide daɨnano jɨaɨruido akɨ dɨno kaɨ uaitaga
daɨi uuritɨkaɨ iadɨ mɨnɨkana kɨoñedɨkaɨ, daɨi uuritɨkaɨ iadɨ ua iñede.

\ref CORD47.008
\tx Jɨaɨ akɨ dɨno taɨno, kaɨ ɨkoɨnia iñede.

\ref CORD47.009
\tx Ie nɨeze mei ñue iyafue mei kaɨ komekɨmo ite.

\ref CORD47.010
\tx Jae daɨita urikano bitɨkue daanɨ kaɨ dɨbenedo urikano bitɨkaɨ iadɨ
bie izoide.

\ref CORD47.011
\tx Akɨ daɨi kaɨ ja dano kaɨ uaitate.

\ref CORD47.012
\tx Ie jira koni kɨodɨkue, daɨde, ba kɨoñedɨkueniadɨ mei nia taɨno
daɨdɨkue.

\ref CORD47.013
\tx Ie fia ba ua ba birui kaɨ raana itɨno iñena onina jira daɨi kaɨ
komekɨ uurite.

\ref CORD47.014
\tx Ie mei nɨɨ uafue kɨodɨkaɨ daɨna ba jitaɨngona ite, jitokomena ite,
jizakuruna ite, eikomena ite, ua nɨɨe.

\ref CORD47.015
\tx Ie jira fia batɨno mei ua iñenia jira be daɨi uuritɨkaɨ iadɨ
kɨoñedɨkaɨ.

\ref CORD47.016
\tx Ie jira akɨ dɨnori kaɨ uai feeitate.

\ref CORD47.017
\tx Raana kaɨ oiakadɨkaɨ o fɨnoakadɨkaɨ, jafue kaɨ komekɨ fɨnode, fɨgo
ua raana mei ua kaɨ komekɨmo iñedɨno.

\ref CORD47.018
\tx Ie jirari, ¿nɨbai mei akɨ daɨi daɨdɨkue?, meita ua ñue ite ua ba
rɨama raa nana ua kuemo iya uuritɨkue ieñede.

\ref CORD47.019
\tx Nɨɨ mei uafuena itɨno uruiaɨ mei ba komuidɨzaɨaɨ komuide.

\ref CORD47.020
\tx Ie mei fia abɨ ua jɨfoye iñena iadɨ fɨgo ieñede.

\ref CORD47.021
\tx Ie jira bie izoi komuidɨkaɨ, kue jenokano ua bie izoi komuide.

\ref CORD47.022
\tx Ie kue mei ua eikomedɨkue, ¿nɨbai mei ua batɨnori bie jae jaka kaɨ
komuiya izoi komuidɨkaɨ?

\ref CORD47.023
\tx Ie mei be nɨɨa, daɨde, bie ua zoofetɨkue ua jamaiena faɨtɨkue, nɨɨa
mei ua jamaiena faɨtɨkue, dɨno izire ote.

\ref CORD47.024
\tx Ie jira bie afeno kue rairuiadɨ, afeno eroidɨkue, kue ɨnɨano, kue
irai fue ingo ɨnɨano.

\ref CORD47.025
\tx Bie mei nɨɨa ie baɨfemo mei ite iadɨ mei ua onidɨkue.

\ref CORD47.026
\tx Ie jira iobiyano uurite, iobiyano taɨjɨde, iobiyano raɨide.

\ref CORD47.027
\tx Afeɨeri kaɨmare uhuride, afeɨeri jiyode.

\ref CORD47.028
\tx Ie kɨgɨmo eroide, kaɨmare, duerede iadɨ, nɨɨ kaɨ maɨrie
erokaidemo uu daɨde, ja bie izoide.

\ref CORD47.029
\tx Ie jira bie ua ¿nɨeze ñeyena?, daɨde, ¿nɨeze ñeñeiye?, daɨde, bie
daama kue abɨ, daɨde, daama kue uieko, daɨde, daama kue
komekɨ, daɨde, daama kue izido, daɨde, daama kue ui, daɨde,
daama kue onokaɨ, daɨde, ja dɨno erokaidemo jɨaɨe kome, uafue,
daɨde, bie jenodɨkue, bie nɨɨ mei ua iñena jira.

\ref CORD47.030
\tx Akɨ ua kaɨ iyano, nɨɨ raana itɨno, nɨɨ uafuena itɨno.

\ref CORD47.031
\tx Iemona bie izoi iteza oni taɨjɨitɨkoko, daɨde, ie jira irai fue ingo
yote, bie moonaiyeza, bie ekayeza taɨjɨitɨkoko, uafue, daɨde.

\ref CORD47.032
\tx Dɨga uai uibiñeno iri, dɨga uai kakareñeno iri, bie koko
moonaitayena, daɨnafuena uurite, bie dɨona, jiibina.

\ref CORD47.033
\tx Ie jira akɨ dɨno rairuirede mei jɨaɨfuena uitanide, joonenide, mei
baɨ batɨnomo ja kaɨ dano ua ja uruena jaaidɨkaɨ.

\ref CORD47.034
\tx Ie yezika baimakɨ iya maɨriedo ite, ie jira.

\ref CORD47.035
\tx Ɨna birui kaɨmo ite, ie yezika be daɨi iñeitɨkue daɨinide, danomo
jaaidɨkaɨ.

\ref CORD47.036
\tx Ie jira mei kaɨ maɨriena ja komuide, kaɨ uaina ja ite, ja ei
daɨdɨkaɨ, moo daɨdɨkaɨ.

\ref CORD47.037
\tx Ie kaɨ ei iñede iadɨ kaɨ ei ifo kaɨ meidoga, kaɨ moo ifo kaɨ
meidoga; meita ja mooredɨkaɨ, ja eeiredɨkaɨ, uafue, daɨde.

\ref CORD47.038
\tx Ie jira akie izoi kaɨ iya jira mei biuai dano ñue kaɨ joonega, nɨɨ ua
kaɨ uaina iite.

\ref CORD47.039
\tx Iemona oni ua raa kaɨ jenuano, oni taɨjɨafue, oni ba fue urue
guiye mɨnɨka kaɨ jenuano.

\ref CORD47.040
\tx Ie mei akɨ ua afenona ite, daɨna kome.

\ref CORD47.041
\tx Ie abɨna akɨ daɨitade iadɨ mei dɨga uai ebirede jaka ite, fɨgo kaɨ
urue izoiñede, ebirede uai ite jaka.

\ref CORD47.042
\tx Ie jira afeɨemo oni urueredɨmɨe oni jaaide, ie jaka eikomedɨkue
daɨna iadɨ afe oni jaaiya.

\ref CORD47.043
\tx Ie jira ja ua afeno ua ba oñeiyena akɨ daɨi uriadɨ mei onoiga.

\ref CORD47.044
\tx Ie mei ua batɨno daɨi ia akɨ dɨno daɨi ite iadɨ onoiñega.

\ref CORD47.045
\tx Ie jira uibiñoga, ie jira yoga, urueredɨmɨe mei urue onoiyena akɨ
daɨi uurite.